2023/05/17

POWERED BY

Гурван өгүүлбэрээр

АмЧам-ын зөвлөмж

Хөрөнгө оруулалтын тухай хуулийн шинэчилсэн найруулгын төсөлд урамшууллын төрөл хэтэрхий цөөн, татварын дэмжлэгүүд хангалттай бус байна гэж Монгол дахь Америкийн худалдааны танхим үзэж байна. Энэ нь Монгол Улс бүс нутгийн хэмжээнд өрсөлдөхүйц хөрөнгө оруулалт татах улс болоход сөргөөр нөлөөлөх бөгөөд ялангуяа хуулийн төсөлд тусгагдсан хөшүүргийг харвал гадаадын хөрөнгө оруулагчид Монгол Улсаас илүү БНСУ, Казахстан, Вьетнам, Камбож зэрэг орнуудад хөрөнгө оруулалт хийхээр байгааг анхааруулжээ. Хуулийн төсөлтэй холбоотой “АмЧам Монгол”-ын бусад зөвлөмжүүдээс дурдвал:

📌 Татварын маргаан таслах зөвлөлийн нэгэн адил “Хөрөнгө оруулалтын маргаан таслах зөвлөл” байгуулах

📌 Арбитраар маргаан шийдвэрлэх зохицуулалт нь хугацаа их авдаг, өндөр зардалтай тул хөрөнгө оруулалтын маргаан шийдвэрлэх тухай заалт нэмэлтээр оруулах

📌 Одоо мөрдөгдөж буй хуульд заасан татварын үндсэн хөшүүрэг болох гаалийн албан татвар, НӨАТ-ын хувь хэмжээний дараах татвараас чөлөөлөх тухай хэсгийг хасалгүй хэвээр үлдээх

НӨАТ-аар оролдож болно vs. болохгүй

Дэлхийн банкнаас 2019 онд гаргасан “Хэтийдсэн өр зээлгүйгээр өсөх нь - Орлого, зарцуулалтын үр ашгийг сайжруулах асуудал” хэмээх тайланд дурдсанаар Монгол улсын хувьд НӨАТ нь тэгш байдлыг сулруулах нөлөөтэй байна. Учир нь өндөр орлоготой бүлэгтэй харьцуулахад орлого багатай хэсэгт илүү хүнд дарамт болж байгаа аж. НӨАТ-тай холбоотой асуудлуудаар Бизнес удирдлагын доктор, эрх зүйч Б.Лхагважав болон Сангийн сайд Б.Жавхлангийн байр суурийг хүргэж байна.

Э.Макрон айлчилна

Франц улсын Ерөнхийлөгч Эммануэл Макрон Монгол Улсад 2023 оны тавдугаар сарын 21, 22-ны өдрүүдэд айлчлахыг Ерөнхийлөгчийн тамгын газар мэдээллээ. Айлчлалын үеэр хоёр улсын Ерөнхийлөгч ногоон эрчим хүч, зам тээврийн асуудлаар хамтарсан төсөл хэрэгжүүлэх талаар санал солилцох аж. Өмнө нь Эрчим хүчний сайд Б.Чойжилсүрэн ярилцлагадаа Э.Макроны айлчлалын үеэр атомын цахилгаан станцын асуудал хөндөгдөнө гэдгийг дурдаж байсан юм. Франц улсын төрийн өмчит “Orano” группийн охин компани Монголд ураны төсөл хэрэгжүүлэгч “Бадрах Энержи” компанийн 66 хувийг эзэмшдэг бол Монгол талаас 34 хувийг эзэмшиж байна.

152 ихдэх үү?

Үндсэн хуульд оруулах өөрчлөлтийг нийтэд танилцуулж, хэлэлцүүлж, иргэдийн саналыг тусгахаар болсныг УИХ дахь Монгол Ардын Намын бүлэг мэдэгдлээ. Энэ хүрээнд УИХ-ын гишүүдийн тоог 152 болгох саналыг өөрчилж, түүнээс цөөн болгох, сонгуулийн холимог системд мажоритар бүтцийг давуу байлгахаар санал тогтсон байна. Өмнө нь УИХ-ыг 152 гишүүнтэй болгож, талыг нь мажоритар, талыг нь пропорционал системээр сонгохоор Үндсэн хуульд өөрчлөлт оруулах санал гаргаад байсан юм.

Нүүрс тээвэр буурав

БНХАУ-ын Ганцмод боомтоор өдөрт нэвтэрч буй Монголын нүүрс тээврийн автомашины тоо бага түвшинд буюу 600-аас доош байгааг “Sxcoal” мэдээллээ. 2023 оны хоёрдугаар сард Монголын талаас нүүрс тээвэр сэргэж, тус боомтоор нэвтэрч буй автомашины тоо 1,000 давж байв. Тэгвэл одоогоор зөвхөн том худалдан авагчдын болон цахим дуудлага худалдааны нүүрсний тээврүүд үргэлжилж байгаа бол жижиг арилжаа эрхлэгчид алдагдлаас шалтгаалан нүүрс авахаа зогсоогоод байна.

Тэрбумын босго руу

Хүн амын насжилт нэмэгдсээр байгаа Япон улсад бизнес эрхлэгчид, энтрепренерүүдэд тулгамддаг асуудал нь өв залгамжлал болоод байна. Тэгвэл Шүнсакү Сагами хэмээх нэгэн залуу Үүсгэн байгуулагч нь тэтгэвэрт гарах дөхөж буй компаниудыг хиймэл оюуны тусламжтай хэлцэлд зуучилж өгөх замаар дээрх төвөгтэй асуудалд шийдэл олдог болжээ. Чухам энэхүү бизнес түүний компанийн хувьцааны ханшийг Токиогийн биржид долоо дахин өсгөж, улмаар хөрөнгийн хэмжээ нь 950 сая ам.доллар хүрч эрс өсөхөд түлхэц болсон байна. Тэрбээр нэгдэн нийлэх хэлцлийн эзэнт гүрнээ хэрхэн босгосон тухай нийтлэлийг ЭНД дарж үргэлжлүүлэн уншаарай.

Нүсэр арилжаа

“Pfizer” компани 31 тэрбум ам.доллароор үнэлэгдэх бонд арилжаалахаар болсон нь АНУ-ын түүхэнд дөрөвдүгээрт бичигдэх хамгийн өндөр дүнтэй бондын арилжаанд тооцогдохоор байна. Нийт захиалга нь 85 тэрбум ам.долларт хүрээд байгаа хөрөнгө оруулалтын зэрэглэлийн тус бондыг компани найман хэсэгт хуваан арилжаалах бөгөөд хамгийн урт буюу 40 жилийн хугацаатай хэсэг нь Засгийн газрын бондоос 1.6 нэгж хувиар өндөр өгөөжтэй байх аж.

Төөрөгдлийг арилгана

Хиймэл оюунаар бүтээгдсэн хуурамч зургууд цахим орчинд ихээр түгж байгаатай холбоотойгоор “Google” компани энэ төрлийн зургийг илрүүлэх, хуурамч мэдээллийн тархалтыг хязгаарлах хэрэгслээ танилцуулахаар төлөвлөж байна. "About This Image" хэмээх шинэ функц нь тухайн зураг анх хэзээ “Google”-д бүртгэгдэж, аль платформд тавигдсаныг харуулах тул хэрэглэгчид зургийн эх сурвалжийг тогтоон, ямар нэг агуулгын өөрчлөлт орсон эсэхийг мэдэх боломжтой юм байна. Мөн хиймэл оюунаар бүтээгдсэн зургуудад “Google” нэг бүрчлэн тэмдэг тавих аж.

Брэндийн соронз

"Gucci" найман жилийн дараа анх удаа Сөүл хотод загварын шоу зохион байгууллаа. Санхүүгийн хүндрэлтэй тулгараад буй тус брэндийг эзэмшдэг "Kering" компани Өмнөд Солонгосын соёлын өсөн нэмэгдсээр буй нөөц бололцоог ашиглаж, мөн тансаг бүтээгдэхүүний хэрэглээгээр Азидаа тэргүүлдэг зах зээлд байр сууриа улам бэхжүүлэхээр зорьж байгаа юм. Сөүл хотын түүхт Кёнбоккун ордонд зохион байгуулагдсан тус шоунд Холливудын жүжигчид, Kpop одод уригдсаны зэрэгцээ Оскарын шагналт "Parasite" киноны хөгжимд моделиуд тайзан дээр алхжээ. "Morgan Stanley"-ийн тооцоогоор "Gucci" брэнд өнгөрсөн онд нийт жижиглэн худалдааны борлуулалтынхаа 9 орчим хувийг БНСУ-аас бүрдүүлсэн аж.

 BloombergTV.mn танд санал болгож байна

• БНТУ-ын Ерөнхийлөгчийг хоёр дахь шатны санал хураалтаар тодруулна

• “Samsung Electronics”-ийн ТУЗ-ийн дарга И Жэ Ён Илон Масктай уулзлаа

• “Nissan”-ийн ашгийн төсөөлөл шинжээчдийн таамгийг давав

Онцлох чарт

Хүн бүр “Metaverse”-ийг ярьж байсан цаг саяхан. Түүнээс өмнө крипто, блокчейн, биткойн халуун сэдэв байлаа. Харин одоо...